الرئيسية
أحدث الصور
استغلي خيالك وإبداعك في إنك تعطي لقطع ملابسك القديمة استخدامات جديدةكل سنة وكل أصدقائنا في كل مكان طيبين وبخير...
غيّري لون ملابسك القديمة
أكيد عندك في دولابك جاكيت قديم أو بنطلون جينز أو حتى بلوزة، بتحبيها أوي، بس مع الأسف قِدْمِت عندك، وبقى شكلها مش جديد..
بكل بساطة ممكن تغيّري مِن شكلها بإنك تصبغيها بلون تاني على الموضة، وعلى فكرة الموضوع ده مش هيحتاج منك غير إنك تختاري محل صباغة كويس، وتختاري لون جديد ومناسب للقطعة اللي هتصبغيها.
بس لازم تحطّي في اعتبارك إن الملابس دي لو غامقة مش هينفع تصبغيها بلون فاتح، وبالطريقة دي هيبقى كإنك اشتريتِ جاكيت أو بنطلون أو بلوزة جديدة.
أعطي لملابسك أطوال جديدة
أوقات بيبقى عندك فستان أو تونيك طويل، كانت بتعجبك قماشته أو النقشة والرسومات اللي عليه، ونِفسك تلبسيه بشكل جديد، وتغيّري مِن شكله، يبقى ممكن إنك تقصّري طوله شوية، وتعملي منه بلوزة أو تونيك بطول مختلف.
والموضوع ده إنتِ ممكن تعمليه بنفسك لو كان عندك ماكينة خياطة في البيت، أو ممكن تعمليه عند ترزي، ومش هيكلّفك إلا مبلغ بسيط جداً، وبكده يبقى إنتِ كسبتي قطعة جديدة في دولابك.
البسي هدومك بطرق مختلفة
ممكن تستغلي خيالك وإبداعك في إنك تعطي لقطع ملابسك القديمة استخدامات جديدة أو تلبسيها بطريقة جديدة؛ يعني مثلاً لو عندك فستان بقى قصير عليكِ ممكن تلبسيه على ليجنج، وتلبسي معاهم حذاء أو صندل شكله حلو وجديد.
كمان لو عندك جيب صَك ممكن تلبسيها زي توب من فوق، وتلبسي عليها حزام، وطبعاً فيه أفكار تانية كتير ممكن تعمليها من خيالك، بس أهم حاجة إن يبقى شكلها مناسب وحلو.
ضيفي زراير بأشكال جديدة ومختلفة
ممكن تجددي من شكل بلوزة سادة عندك؛ بإنك تضيفي عليها مجموعة من الزراير بألوان وأشكال حلوة، وتوزّعيهم عليها بتنسيق معين، وممكن تختاري الشكل اللي إنتِ عايزاه من صور على النت أو في أي مجلة عن الموضة.
الإكسسوارات بتعطي شكل جديد للملابس
طبعاً الإكسسوارات من الحاجات المهمة أوي اللي بتغيّر من شكل ملابسنا، وبتدّيها روح ولوك مختلف.
يعني ممكن تضيفي قطع من الإكسسوارات بألوان جديدة ومميزة؛ علشان تعطيكِ شكل جديد؛ يعني ممكن تلبسي عُقد شيك بألوان متداخلة تكون لايقة مع البلوزة أو البادي اللي هتلبسيه، أو تلبسي مجموعة غوايش كتير مع بعضها، وعلى فكرة دي طالعة موضة جداً من الصيف اللي فات.
اعملي مزيج بين القطع القديمة والجديدة
ممكن تشتري قطعة ملابس جديدة؛ علشان تحيي بها قطعة قديمة عندك؛ يعني ممكن تجيبي إيشارب أو اسكارف جديد، وشكله حلو، وألوانه مبهجة، وتلبسيه على شيميز أو بلوزة أو فستان قديم عندك، وتربطيه بشكل جديد، ومختلف على رقبتك.
وممكن تجيبي بوليرو وتلبسيه على تونيك قديم، بس أهم حاجة في الطريقة دي هي تنسيق الألوان؛ بحيث تدي شكل مختلف وجذاب للعين، كمان الطريقة اللي بتلفي بها الطرحة والألوان اللي بتختاريها بتفرق كتير جداً في إظهارك بشكل مختلف ومميز.
ودي بعض النصايح اللي هتساعدك وإنتِ بتركّبي أو بتدخّلي ألوان مع بعضها:
- الأبيض والأسود والرمادي بيعتبروا من الألوان المحايدة، واللي ممكن تلبسي معاها أي لون إنتِ عايزاه.
- ينصح بعدم ارتداء أكثر من 3 ألوان مع بعض.
- راعي إن الطقم اللي هتلبسيه يكون فيه لون واحد هو اللي طاغي وواضح، وباقي الألوان تكون هادية ومناسبة معاه.
- لو فيه منطقة في جسمك عايزة تبيّنيها بشكل أرفع يبقى اختاري لها قطعة ملابس يكون لونها غامق.
- الألوان الحيوية والزاهية زي الفوشيا والأورانج والموف بتكون مناسبة جداً لقطع الملابس اللي بتكون قريبة من الوش؛ زي البلوزة أو التونيك أو البادي؛ لأنها بتنوّر الوش، وبتدّي له طلّة حلوة جداً.
ودي كانت شوية أفكار ونصايح بسيطة ممكن تعمليها...
علشان تظهري بشكل جديد على العيد من غير ما تدفعي مبالغ كبيرة
» طريقة عمل السينابون بالصور
» بلوزات كروشيه بالباترون
» بالصور أفكار راقية لعمل خطوبة أوكتب كتاب في البيت
» أتفرجى على أحلى الاقطان
» فساتين سواريه للمحجابات رووووووووعه
» حلم غريب مش عارفه افسره
» ديكورات اسقف 2011
» زوجي الحبيب انا مغرورة بيك